Videò corta in quant’à a scuparta di a donna di Bunifaziu, un schenatru fussili fiminili (circa 6750 nanz’à Cristu) chì saria, sicondu i scentifichi, quiddu di a Corsa piu anziana. Hè ammintata a storia di a scuparta da Francescu de Lanfranchi è Michel-Claude Weiss in u 1972, à nant’à u situ d’Araguina Sennula. Sò ammintati dinò i ricerchi archiulogichi chì fecini veda ch’edda era stroppia issa donna è ch’edda ùn avaria pussutu campà senza l’aiutu di i soi. U schenatru era cupartu à ocra rossa, sicondu un rituali listess’à quiddu adupratu à u Mesuliticu cuntinentali, dicini i scentifichi.