Edmond Simeoni nasci in Corti u 6 d’aostu di u 1934 è a so zitiddina a passa trà Lozzi è Francardu.

Faci i so scoli in Bastia, po parti à ritruvà u frateddu Max à a facultà di Midicina di Marseglia. Culà, ferma stupitu Edmond : a Corsica « arcaica » di l’epica spicca in tuttu da u cuntinenti beddu ciuttatu in a mudernità.

In Bastia, apri u so cabinettu di gastruentirulugia in u 1965. Dui anni dopu, suvita à  Max in l’Azzioni Rigiunalista Corsa, chì voli difenda l’intaressu di i Corsi è l’Autunumia di l’isula.

Agostu di u 1975 : Edmond Simeoni porta militanti di l’ARC à occupà a cantina vinicula Depeille in Aleria. S’upponini à a pulitica agricula di u guvernu, à discapitu di l’agricultori corsi.

Sò più di 2000 i giandarmi ad assaltà a cantina, occupata da una dodicina di militanti cù fucili di caccia. Nasci a stragi : dui morti in i forzi di l’ordini, un fertu gravu frà l’autunumisti.

Tandu s’infiara a Corsica ed hè arristatu Edmond è cundannatu à cinqui anni di prighjò.

In u 1982, faci parti di i prima eletti di l’Assemblea di Corsica, cù i so cumpagni di l’Unioni di u Populu Corsu.

Cù Noëlle Vincensini, participeghja à a criazioni di u cullittivu antirazzistu Avà Basta, in u 1985, po fonda l’associu Corsica Diaspora in u 2004.

Edmond Simeoni mori u 14 di dicembri di u 2018, à 84 anni.

U Babbu di u naziunalisimu corsu ferma in i menti com’è una figura di trinca di a Corsica ughjinca.