Videò biugraffica corta di Daniella Casanova, da a so nascita in Aiacciu, u 9 di ghjinnaghju di u 1909, sott’à u nomi di Vincintella Perini in sin’à a so morti, u 9 di maghju di u 1943. Hè ammintatu u so parcorsu puliticu, à parta si da a so adisioni à u Partitu cumunistu, quand’edda era studianti in chirurgia dintaria. Tandu participava à parechji associ studiantini è divinteddi rispunsevuli di i Ghjuvantù Cumunisti. In u 1936, fonda l’Unioni di i Femini di Francia è inizia parechji azzioni, par indettu à prò di i ripublicani spagnoli. In u 1939, hè pruibitu u Partitu cumunistu è Daniella s’impegna in a clandestinità. In u 1942, hè arristata da a pulizza francesi, imprighjunata po dipurtata in Auschwitz-Birkenau. U 9 di maghju di u 1943, mori da u tifu. I so cennari riposani in Vistale, un pughjolu di Piana, u so paesi. Li darani a midaglia di l’Ordini Naziunali di a Legioni d’onori à titulu pòstumu. Ferma pà sempri una figura trimenda di a Risistenza.