Videò corta à nant’à a vita è l’opara di Marie Susini, nata u 18 di ghjinnaghju di u 1916 in Rennu, da i so anni di studii di filusuffia è di Lettari à i so funzioni di bibbiuticaria è di cunservatrici à a Bibbiuteca naziunali di Francia. A so opara parla di a Corsica, di l’identità, di l’isula rinchjusa. Subbitu in i so prima rumanzi (Plein Soleil, 1953, La fiera, 1954, chì si passani in u circondu di Rennu è di Vicu) sò prisenti u misteriosu è a putenza di i sintimi. Sò cunsacrati à a Corsica i so ultimi opari dinò, in a racolta L’île sans rivages, isciuta in u 1989. Marie Susini mori u 22 d’agostu di u 1993 in Tuscana ed hè intarrata in Vicu.