Trà i torri di a Castagna è di l’Isulella, a furesta di Coti Chjavari, induv’eddi a si spasseghjani l’Aiaccini, si ramenta un passatu grevu chì cuminciò di ghjinnaghju di u 1855. U duminiu u si piglia l’amministrazioni penitenziaria di l’epica, da fà ni una culunia agricula. Hè cusì ch’eddi campani i prighjuneri, alzendu infrastrutturi (chì si poni sempri veda oghji) è travagliendu a tarra (urtaglia è risanamentu di i lochi cù i pustimi di calitti). In u 1906, sarra u duminiu par via di a murtalità trimenda è di a poca rinditibilità. Tandu i prighjuneri i portani in Cayenne è u duminiu u gestisci a Dirizzioni di l’Acqua è di i Furesti. Sò stati parechji à vulè impussissà si ni, longu à u vintesimu seculu. Oghji ghjornu, u bastimentu principali (i celluli) è u circundaghju appartenini à una sucità privata chì ci faci fistività.

In u restu di u duminiu, si hè turrata à impatruniscia si a natura è s’hè sviluppatu un veru ecusistema. A biudiversità di i spezii lucali hà datu una bedda furesta maditerranea, cù lecci, listinchi, morti, albitri, pini, ogliastri è altri pianti machjaghjoli, induv’eddi ci campani cignali, volpi, meruli, cuparchjati è ruditureddi. È puri ferma fragili assai st’ambienti, prutettu da a CDC chì gestisci una parti maiò di u situ.