In u golfu d’Aiacciu, in a piaghja di Campu di Loru, ghjugnini in mari i fiumi Prunelli è Gravona, dop’à un delta è à paduli chì prima erani lochi pocu sani. Sta zona umida, trà l’aeruportu è Purtichju, si stendi da u Ricantu in sin’à a torra di Capitellu, una torra genuvesi in facci’à a quidda di a Parata, in l’isuli Sanguinari.

Fuddi accunciatu un spaziu naturali sinsibuli di 35 ettari, di tippu tumbulariu, trà l’aeruportu è u mari, da pruteghja razzi animali è vegetali endemichi : a « Linaria flava » (chì ci hè dinò in Sardegna), a ghjinestra (detta « di Salzmann ») è un mudduscu unicu chì l’abitatu ùn si trova più in qualunqua altra parti di u mondu, a corrulamaca corsa (Helix Ceratina), cù menu di 5 000 individui.

Stu situ l’ani calcicatu parechji generazioni di spassighjadori ed era abbandunatu in sin’à a fini di l’anni 1990. Da ch’omu hà turratu à scopra i spezii endemichi, u Cunsirvatoriu di u litturali è a CDC ani sarratu u sittori, da fà ni a risturazioni eculogica è a valurizazioni è turrà à dà li a so biddezza d’origini.