Trà Aiacciu è Prupià, à nant’à i cumuni di A Sarra di Farru è di Coti Chjavari, eccu a cala magnifica di Cupabia. Trè stesi di rena fina cinti da i scogli, à l’arici di i ghjinepari è di i listinchi, vicin’à lochi umidi cù una vegetazioni ricca.

Ci si aggrottani è ci magnani parechji aceddi, migratori o sidintarii ch’eddi sichini : anchilonghi, aironi, puppusgi, ciuffuti, meruli, turtureddi frà altri.

À pena scantati, si vedi dui munimenti in Cupabia : a torra di Capanedda è una lastra in mimoria di i risistenti tombi in u 1943, quand’eddu sbarcheddi u sottumarinu inglesi Saracene pà una missioni di rinsignamentu.

A soprafraquintazioni di u situ hè una minaccia pà l’equilibriu di st’ecusistema è ci vurria à accuncià lu da pruteghja lu. U spaziu naturali sinsibuli di Cupabia u gestisci a pulitica di l’ambienti di a CDC da a prutizzioni è a valurizazioni.

Stu situ « Natura 2000 », di gran valori eculogica, hè una riserva di biudiversità biddissima.