Trà mari, petra è machja, bisogn’à pruteghja u rinaghju corsu da l’abusi di l’Omu. A CDC è u Cunsirvatoriu di u Litturali ani missu in baddu una pulitica ambiziosa pà l’ambienti, pà a prutizzioni è a valurizazioni di sti zoni rimarcavuli chì facini l’identità di a Corsica : i « spazii naturali sinsibuli ».

Si tratta di :

-accuncià zoni umidi, tombuli di rena o furesti,

-fà da riabilitazioni d’ecusistemi è à l’urganizazioni di a so fraquintazioni,

-parà spazii beddi è fragili da l’urbanizazioni è da i minacci nati da l’attività umana (rumenzula, calcicati, parcheghju, passaghju di vitturi, fochi).

Si vedi dunqua quì a missa in valori di un paisaghju culturali, a risturazioni di u patrimoniu campagnolu o militari (torri di u litturali), chì sò più di centu in Corsica (tal’è Roccapina, Coti Chjavari, Capu Rossu, Cupabia o u Ricantu). Da ch’eddu possi l’Omu cuntinuà à goda issi spazii maravigliosi è campà ci, hè vitali par eddu di rializà ch’edda dipendi da a so rispunsabilità ch’eddi campani issi lochi, in equilibriu.