In u 1986, Mighele Raffaelli spieca à u ghjurnalistu, Ghjiseppu Castellani, parchì ch’eddu hà vulsutu sviluppà un teatru prufissiunali in lingua corsu cù a criazioni di u « Teatru di a Testa Mora ».

Fendu a leia trà lingua è travagliu, voli dà fiatu à una dramaturgia corsa senza influenzi da fora. Hè un travagliu di ricerca è di maestria di i segni più ghjusti, più uriginali è più caratteristichi di a cultura corsa. Si pudaria « stabbilì un circuitu rilaziunali di i culturi teatrali è musicali », da fà la viaghjà in Sardegna, in Italia o in cuntinenti.