A ghjesgia San Ghjambattistu di Carbini fù unu di i prima munimenti di Corsica classificati è risturati à parta si da u 1839, à marzè di Prosper Mérimée chì à l’epica era incaricatu d’allistinà i munimenti storichi.

L’avaria fundata u maestru pisanu Maternato, in a prima mità di u XII^mu seculu. Tandu a Corsica a guvernani i Pisani, cù u scopu di stabbilì a putenza rilighjosa di u papa Urbanu II, par via di a Riforma griguriana, sicondu 3 punti : riforma di u cleru, auturità di u papa è scumpartera di a Corsica in 5 viscuvati, cù quissi scumpartuti in pievi o diòcesi.

Sta ghjesgia rumanica di granitu palesa simbuli caratteristichi di u Medievu : mudiglioni è bacini (accunciamenti cù cunconi di ceramica) è un campanili à parti, à l’usu tuscanu. In u 1352 fù fundata a cungrigazioni di i Ghjuvannali da Giovanni Martini. Sò discipuli di San Francescu d’Assise, cù una brama d’umilità è di puvartà. U picculu populu hè scunvitu, ed hè cuntistata l’auturità di u vescu d’Aleria. I Ghjuvannali sò dichjarati eretichi, persiguiti, parsicutati è certi ancu brusgiati.