Corti, à mezu traghjettu trà Aiacciu è Bastia, fù scelta da capitali di a Corsica da Pasquale Paoli, in u 1755. Paoli feci rifà u palazzu publicu, alzatu da i Genuvesi à a fini di u 16^mu seculu, chì divintò tandu u « Palazzu naziunale », da induv’eddu guvirnava. In u 1765, feci apra a prima università di Corsica pà 300 studianti, chì chjuditi in u 1769.

À a mità di u 19^mu seculu, Corti divinteti una cità di guarnighjoni, in sin’à u 1981, quand’edda riapriti l’università, chì da tandu si chjama « Università di Corsica Pasquale Paoli ». Cù 4 000 studianti è 200 insignanti circadori, dà un fiatu novu à Corti. In u 1997, a CTC faci di l’antica Caserna Serrurier, in citatedda, un museu righjunali d’antrupulugia di a Corsica. Cù l’università è u museu, Corti hè divintata una cità culturali.