À nant’à l’isula più maiò di i Sanguinari, Mezu Mari, si vedini i ruvini di un lazarettu. Fù custruitu trà u 1806 è u 1808, da isulà i curagliaghji corsi vultati da l’Africa, chì pudiani purtà malatii murtali è caghjunà epidemii. In u lazarettu ci stavani i piscadori cù i so barchi, un duttori, un’infirmieri è ottu guardii. Ricivitini i malati duranti quaranta anni.

In u 1764, sò 4000 l’Aiaccini è 600 à campà di u cummerciu di u curagliu. Era ricircatu è prizzatu in tuttu u Maditarraniu par via di i so qualità dicurativi è magichi. Ma fù trapiscatu è ci vulia à andà à circà lu in altri mari.