« Civitas Calvi semper fideli »s : eccu u mottu chì palesa a storia di Calvi incù Genuva, chì a si piglieti à u 13^mu seculu, dop’à anni è anni di lotta cù i Pisani. Di fatti, i dui ripublichi a si cacciani pà impatruniscia si di st’isula di postu strategicu in u Maditarraniu. I signori corsi pigliani a pratesa di l’una o di l’altra è si scumpartini a Corsica. In u 1453, l’Uffiziu di San Ghjorghju, un associu di ricchi Genuvesi chì gestisci a Corsica, dicidi di rinfurzà u postu di Calvi. Faci alzà un casteddu novu (chjamatu oghji « Palazzu di i guvernatori ») è furtificazioni : i dui diventani a citatedda ch’è no cunnuscimi oghji.

I Calvesi diventani citatini genuvesi : si poni francà l’impositi è certi participeghjani à l’amministrazioni di a cità. Par via di l’attività cummirciali, marittimi è agriculi, s’arricchiscini, comprani opari artistichi è alzani ghjesgi. A vistiga di u passatu genuvesi di Calvi si vedi in ogni locu, è si capisci tandu a so fideltà à « a Superba » in sin’à u 18^mu seculu.