À u XIX^mu seculu, i prima turisti (parodda vinuta da l’inglesi « tour ») scoprini a dulcezza di u clima aiaccinu, ma strutturi par riceva li ùn ci n’hè. Di pett’à a dumanda, u conti Bacciochi, ministru di Napuliò III, miss Campbell, una ricca scuzzesi è Bernard Bradshaw, un altru britannicu, riflettini à u sviluppu di u quartieru chì và da u corsu Grandval à u Casoni.

Tandu s’aprini numarosi hotels, « cuttesci » (« cottages ») è casi di lussu. In u 1890, Bartulumeu Maglioli cuncipisci u Grand Hotel, emblematicu di u quartieru (a sedia di a CDC oghji). Ci ghjugnini i turisti inglesi, sguizzeri è tedeschi, à passà ci l’inguernu, incantati da a dolci vita aiaccina. Hè cusì ch’eddu nasciti u « Quartieri di i Stranieri » è a nomina d’Aiacciu in tantu chì stazioni d’inguernu.

In u 1898, Henri Matisse ci starà l’annata, à scopra è pigna a luci particulari di a cità.