U casteddu di Cucuruzzu, nant’à u pianu di Livia, in l’Altarocca, hè u situ più assignalatu di l’Ità di u Bronzu in Corsica (trà 2 000 è 1 000 anni n.C), à listessa epica cà i nuraghi sardi. À a fin di st’epica, i torri futini furtificati da muraglioni larghi da 2 à 4 metri è alti 5 metri ; issi muraglioni sò fatti di petri, certi ciclopichi. Si vedi binissimu u situ cù u schema prisintatu à u minutu 2.38 di u filmettu.

U casteddu faci da locu di riparu è da granaghju, è tuttu faci capiscia chì u scopu maestru era di difenda si. Cù i ricerchi archiulogichi, s’hè pussutu riguarà assai elementi di a sucità agrupasturali di tandu à u museu di Livia : farri, stuvigli di tarra cotta, punti di flezzi, sporti, ghjuveddi… L’armi truvati in Cucuruzzu, spadi o pugnali ch’eddi fussini, sò listessi cà quiddi riprisintati à nant’à i palatini di Cauria.

Cucuruzzu futi occupatu in sin’à u Medievu, ma si pò scopra un altru situ vicinu, à 20 minutu marchjendu : Capula. Culà truvetini una stantara è i ruvini di un casteddu medievali, è ancu u schenatru di una donna di u prima seculu nanz’à Cristu, chì si pò veda à u museu.