Carghjese, in Corsica suttana, hè un paesi d’origini greca.

In lu 1675, 800 Grechi fughjini i parsicuzioni ottomani è ghjugnini in Genuva. In u 1676, sò 680, mandati da i Genuvesi, à ghjugna in Paomia, sopr’à Carghjese. Pà u più sò agricultori, è ponini granu, vigna, alivi è arburini. Ma i pastori corsi i scacciani da sti lochi, anziani pascuri.

Tandu falani in Aiacciu, induv’eddi ci stani fin’à u 1770. Dopu ch’edda fussi data a Corsica à a Francia da Genuva, u conti Marbeuf deti una parti di u tarritoriu di Carghjese à i Grechi. A cumuna hè ufficializata da un dicretu, in u 1773 è ci stabbiliscini. Da tandu si cunnoscini à i so casati cursizati : Dragacci, Zanetacci, Pappadacci…

In u 1852, l’uniati (sò chjamati cusì i Grechi urtudossi) facini alzà una ghjesgia, San Spiridione, da pudè praticà u so ritu (intigratu à u catulicisimu). Si pò sempri veda oghji a so icunustasi assignalata è senta a messa in grecu.