In Biguglia, eccu u stagnu di Chjurlinu, u stagnu più maiò di Corsica, cù 1 450 ettari di superficia. Un frisgiu di rena u spicca da u Tirrenu, trà u mari è a muntagna.

In u stagnu si faci a pesca è l’agricultura da seculi è seculi, chì, par via di u mischiu trà acqui dolci è saliti ci hè una ricchezza biulogica tamanta. Sò più di 250 razzi d’aceddi, migratori o inguernanti ch’eddi sichini, è più di 450 spezii vegetali chì si poni veda in Chjurlinu. I pesci sò numarosi dinò, è i piscadori, di branu, i sceglini vicinu à l’anzianu furtinu divintatu oghji museu.

Par via di a crescita di a pupulazioni, hè crisciuta dinò l’urbanizazioni in ghjiru à u stagnu : casi, scoli, strutturi turistichi, chì minacceghjani l’ambienti naturali è vegetali. Par ciò, u Cunsigliu Generali di Corsica suprana, u prupiitariu di Chjurlinu, pruteghji a riserva criata in u 1994, di modu eculogicu è patrimuniali.