Fù rializatu à a fini di u 19^mu seculu u cammin di farru di a Corsica, è si stendi oghji nant’à 232 chm, cù dui ligni : Bastia-Aiacciu, passendu pà Corti, è u Ponte à a Leccia-Calvi.

A prima via farrata a traccetini da Bastia à Corti in u 1888, è futini sprupusitati i travagli da francà vaddi è muntagni. Attrazzetini 22 lucumutivi da suvità la ; si fecini 43 tunneddi, 76 ponti è viadotti, è ci travaglietini più di 20 000 oparai (pà u più taliani) duranti parechji anni, da rivuluziunà i trasporti in Corsica.

Ci volsi sei anni, trà u 1880 è u 1886, da custruiscia 4 chilometri di ragli ! U viadottu di u Ponti di u Vechju, longu 142 metri,  u cuncipiti Gustave Eiffel è fù alzatu trà u 1891 è u 1893. Da sopr’à u fiumi, ci passa sempri oghji u trinnicheddu, à 94 metri d’altezza.

Oghji ghjornu, hè più di un seculu ch’eddu viaghja u trinnicheddu, purtendu i studianti di l’università di Corti è i turisti. U gestisci a sucità di i Cammin di Farru di a Corsica, hè statu mudernizatu ed hè un modu piacevuli di scopra l’isula.