Da a parti meridiunali di u golfu di u Vaddincu, eccu a torra di Campumoru, caratteristica di l’epica genuvesi sott’à l’Uffiziu di san Ghjorghju. Sti custruzzioni i fecini da risponda à u priculu barbarescu, trà i 16^mu è 17^mu seculi. Tandu, a Corsica hè un locu di cunfrontu trà cristiani è musulmani. I Corsi si difendini com’eddi poni è, à parta si da u 1520, i Genuvesi cumenciani à fà alzà i torri di u litturali da l’abitanti.

U più spessu, si facini in mari i battagli, è i turrisgiani (quiddi chì stani in i torri) mandani signali cù u fumi da infurmà in quant’à ciò ch’eddi facini i nimichi. I torri l’adoprani dinò da cuntrullà u cummerciu è u braccunaghju. In a torra di Campumoru si vedi i piumbatoghji è l’accinta in forma di stedda (hè a sola in Corsica), induv’eddi s’aggrondani i cavaddi di i suldati è i marinari di i batteddi amichi. In u 1992, hè classificata da i Munimenti storichi.