In Muratu, eccu unu di i più beddi edifizii di l’arti rumanica di stili pisanu di Corsica : a ghjesgia San Michele.

In u 1092, u papa Urbanu II rinforza l’auturità rilighjosa in Corsica, cù a Riforma griguriana, chì hà inghjinnatu a scumpartera di l’isula in viscuvati, viscuvati scumpartuti in pievi, cù a ghjesgia piuvana à u centru. A custruzzioni di sta ghjesgia s’assumiglia à quidda di a catidrali di Pisa (listessu pà quiddi d’Aregnu o di Carbini).

San Michele di Muratu hè più cà assignalata par via di a so architettura pulicruma, fattu cù petri di u locu : a bedda sarpintina grisgia verdi è u calcariu bianchicciu di San Fiurenzu. A ghjesgia hè cumposta da una navata sola, longa 14, 35 metri è larga 5, 5 metri è d’un’absidi, ed hè urnata da frisgi dilicati è di una curnici cù l’arcati cù mudiglioni à nantu, chì riprisentani animali o umani in rilevu.

In u 1839 Prosper Mérimée, mandatu da i Munimenti Storichi, ammintò l’architettura è a ricchezza di a facciata, a finezza di i sculturi è u mischiu irregulari di i culori. È puri, stu mischiu faci pinsà à un tempiu di l’Antichità più cà una ghjesgia.

Stu simbulu di l’arti rumanica à l’usu pisanu fù dichjaratu munimentu storicu in u 1875.