Longu 40 chm è largu 15 chm, u Capicorsu hè da veru « un’isula in l’isula ». A riserva naturali, chì si stendi da Macinaghju à Centuri è i 654 ettari acquistati da u Cunsirvatoriu di u litturali, venini à pruteghja un patrimoniu ambientali, biulogicu è culturali tamantu.

Vicin’à Ruglianu, eccu a cappedda Santa Maria, cù i so dui àbsidi ; à stu locu, ci saria stata una necropuli rumana. Si vedi dinò a torra di Santa Maria, alzata à u XVI^mu seculu, in tempi di l’assalti barbareschi. Più luntanu, trà Ersa è Centuri, eccu i mulini à ventu induv’eddu si facia a farina castagnina o di granu, è ancu l’oliu d’aliva.

Hè un veru paradisu pà l’aceddi marini è i marchjadori (longu a stretta di i duganeri), cù reguli stretti. Hè gestita a riserva di a punta di Capicorsu da l’associu A Finuchjarola, sustinuta da u Cunsigliu Generali di u Cismonte è u Parcu Naturali di a Corsica. Stà attenti à pruteghja è mantena u spaziu naturali, i razzi di l’animali è di vegetali, di pett’à a minaccia di u turisimu di massa.