L’ochji di l’acqua acitosa d’Orezza hè in Castagniccia, nant’à a cumuna di Rapaghju. Hè l’acqua più famosa di Corsica. A cunnusciani dighjà i Rumani à l’Antichità, è Pasquale Paoli si facia a so cura d’acqua farrughjinosa à u Cunventu d’Orezza. Tandu, ùn si biia micca st’acqua.

In u 1856, un dicretu imperiali ricunnosci l’acqua d’Orezza da intaressu publicu è sò criati i bagni. Duttori corsi aviani studiatu i virtù curativi di l’acqua acitosa, ricca di farru, pà i malatii di u fecatu o di i reni par indettu, è dinò pà l’anemia è a malaria. Si pudia ancu truvà in farmacia. In u 1930, chjudini i bagni ma  hè sempri sfruttata l’acqua.

In u 1995, dui paisani dicidini d’ottena a cuncissioni da u Cunsigliu Generali (u prupiitariu). Fondani a Sucità nova di l’acqui minerali d’Orezza, po alzani un’usina d’imbuttigliera autumatizata in tuttu in u 2000. Oghji ghjornu, l’acqua acitosa hè cunnusciuta da mari in là è faci parti di u patrimoniu culturali è identitariu isulanu.